01 марта 2013 г.
Тĕрĕссипе каласан, ял хуçалăх предприятийĕсенчен чылайăшĕ тахçанах техникăсене юсанă, вăрлăхсене тĕрĕсленĕ тата ытти кирлĕ ĕçсене пурнăçланă ĕнтĕ. Шăпах çак темăпа çыхăннă ыйтусене район администрацийĕнче иртнĕ канашлура сÿтсе яврĕç.
Россельхозцентрăн Чăваш Республикинчи филиалĕн ертÿçин çумĕ А. Титова çурхи ĕçсене туса ирттересси пирки калаçрĕ. Февралĕн 22-мĕшĕ тĕлне Шупашкар районĕнче вăрлăхсене 82% хатĕрленĕ. «Кăçал май уйăхĕ типĕ пулма пултарать, çавăнпа та çурхи ĕçсене маларах тытăнмалла, – асăрхаттарчĕ вăл. – Шăрăха чăтма пултаракан сортсем аксан лайăх». Хими препарачĕсем çине мар, биопрепаратсем çине пусăм тумалла. Ака ирттермелли плана вара паянах хатĕрлемелле. Унта вăрлăх, удобрени, çунтармалли-сĕрмелли материалсем мĕн чухлĕ кирлине палăртмалла. Ял хуçалăх предприятийĕсене задани пулчĕ, çав плана мартăн 13-мĕшĕччен хатĕрлесе администрацин ял хуçалăх пайне килсе памалла.
Канашлăва хутшăннă район администраци пуçлăхĕ Г. Егоров иртнĕ çулхи кĕркунне çумăр пулнă пирки тыр-пула пухса кĕртме çăмăлах пулманнине аса илчĕ. Районта тырă типĕтмелли комплекс пулсан лайăх, анчах хальлĕхе вăл çук, çакă вара çивĕч ыйту çуратать.
Источник: "Тăван ен"
Первоисточник: http://www.smi21.ru